ढाका। बांग्लादेश म 12 फरवरी के होय आम चुनाव म बड़ जीत के बाद नेशनलिस्ट पार्टी (बीएनपी) के अध्यक्ष तारिक रहमान ह मंगलवार के नवा प्रधानमंत्री के रूप म शपथ लिहिन। 60 बछर के तारिक रहमान ह पूर्व प्रधानमंत्री खालिदा जिया के बेटा आयं। ए बार शपथ ग्रहण के कार्यक्रम ह परंपरा ला छोड़ के राजभवन के जगह संसद परिसर के साउथ प्लाज़ा म रखे गे रिहिस। भारत कोती ले लोकसभा स्पीकर ओम बिरला ह ए कार्यक्रम म सामिल होय बर पहुंचे हें।
तारिक रहमान के संग बिदेस सचिव विक्रम मिश्र अउ लोकसभा के महासचिव उत्पल कुमार सिंह घलो ए समारोह म सामिल हो सकथें। बीएसएस न्यूज एजेंसी के मुताबिक, राष्ट्रपति मोहम्मद शाहबुद्दीन ह मंगलवार के मंझनिया जाटिया सांग्सद परिसर म नवा मंत्रिमंडल ला शपथ दिलवाइन। बीएनपी के नेता मन के कहना हे कि बहुमत वाले पार्टी के नेता के रूप म तारिक रहमान ह अब देस के कमान सम्हालहीं।
बता दन कि तारिक रहमान ह अब अंतरिम सरकार के प्रमुख मुहम्मद यूनुस के जगह लिहिन। यूनुस के राज म ढाका अउ नई दिल्ली के बीच के रिस्ता म थोरिक तनाव देखे बर मिले रिहिस। तारिक रहमान ह 1991 के बाद देस के पहिली पुरुष प्रधानमंत्री घलो बनहीं।
बांग्लादेश म 13वां आम चुनाव 12 फरवरी के होय रिहिस, जउन ह राजनीतिक संकट अउ अस्थिरता के बीच पूरा होईस। ए चुनाव म शेख हसीना के पार्टी आवामी लीग ला चुनाव लड़े के अनुमति नई रिहिस। चुनाव आयोग के मुताबिक, बीएनपी ह 297 सीट म ले 209 सीट म जीत दरज करे हे, जबकि जमात-ए-इस्लामी ला 68 सीट मिलीस हे।
