( हिंगोरा सिंह, लखनपुर, सरगुजा )
लखनपुर। सरगुजा जिला के लखनपुर सहित आसपास के क्षेत्र मन मा बुधवार अउ गुरुवार के दिन रंगों के परब होली ह भारी धूमधाम अउ उत्साह के साथ मनाय गीस। ए बछर चंद्र ग्रहण के सेती होली के आयोजन ह एक दिन बाद यानी 4 मार्च बुधवार अउ गुरुवार के संपन्न होइस। बिहनिया ले ही मनखे मन ह एक-दूसरे ल रंग-गुलाल लगाके परब के सुरुआत करिन।
मंत्री निवास मा होली मिलन समारोह
नगर मा कैबिनेट अउ पर्यटन मंत्री राजेश अग्रवाल के निवास मा 3 मार्च मंगलवार के दिन ‘होली मिलन समारोह’ के आयोजन करे गे रहिस। ए समारोह मा क्षेत्र के मनखे मन भारी संख्या मा पहुँचीन। पर्यटन मंत्री ह सबो झन ल गुलाल लगाके होली के बधाई दीन अउ आए मेहमान मन बर खान-पान के सुग्घर बेवस्था करे रहिस। मंगलवार के साँझ कुन लखनपुर पत्रकार संघ ह घलो मंत्री निवास पहुँच के होली के शुभकामना दीन।
गली-खोर मा दिखीस उत्साह
कुंवरपुर, कोसंगा, बंधा गणेशपुर सहित सबो ग्राम क्षेत्र मन मा सार्वजनिक जगा, बाजार अउ गली मन मा लइका अउ जवान मन के टोली ‘होली हे’ के नारा लगावत रंग मा सराबोर नजर आईन। बुजुर्ग मन ह पारंपरिक फाग गीत गाके पुराना परंपरा ल जीवंत कर दीन। माई लोगन मन घलो समूह मा एक-दूसरे ल गुलाल लगाके बधाई दीन। घर-घर मा सुबह ले पकवान के खुशबू महकत रहिस, जिहाँ मेहमान मन के स्वागत गुजिया, नमकीन अउ ठंडाई ले करे गीस।
पुलिस प्रशासन रहीस मुस्तैद
होली के तिहार मा कोनो अनहोनी झन होय, एखर बर पुलिस प्रशासन ह चौक-चौराहों अउ गाँव-गाँव मा जवान मन ल तैनात करे रहिस। थाना प्रभारी संपत पोटाई के नेतृत्व मा पुलिस ह लगातार पेट्रोलिंग करिस। तीन सवारी अउ नसा मा गाड़ी चलाय वाला मन ल कड़ा हिदायत दिय गीस। गुरुवार के दिन लखनपुर थाना परिसर मा पुलिस वाला मन ह घलो एक-दूसरे ल गुलाल लगाके होली मनाइन अउ आपसी भाईचारा के संदेस दीन।
